సైనిక రహస్యాలు లీక్‌ చేస్తే కాల్చి చంపాలి.. ట్రంప్‌ సంచలన వ్యాఖ్యలు
- సైనిక రహస్యాలు బయటపెట్టే వారికి కఠిన శిక్షలు విధించాలని ట్రంప్‌ వ్యాఖ్య
- ఇరాన్‌పై దాడి వివరాలు మీడియాకు లీక్‌ కావడంతో ఆపరేషన్‌ సమయం మార్పు
- న్యూయార్క్‌ టైమ్స్‌, సీఎన్‌ఎన్‌ వార్తల్లో వివరాలు వచ్చాయని ఆరోపణ
- లీకేజీకి పాల్పడిన వ్యక్తి ఎవరనేది వెల్లడించని అమెరికా అధ్యక్షుడు
అమెరికా అధ్యక్షుడు డొనాల్డ్‌ ట్రంప్‌ సైనిక రహస్యాల లీకేజీపై సంచలన వ్యాఖ్యలు చేశారు. దేశ రక్షణకు సంబంధించిన కీలక సమాచారాన్ని బయటపెట్టే వారిని కాల్చి చంపాలని వ్యాఖ్యానించారు. అలాంటి వ్యక్తులకు జీవితాంతం జైలు శిక్ష విధించాలని కూడా అన్నారు. అరిజోనా రాష్ట్రంలోని బుల్‌హెడ్‌ సిటీలో నిర్వహించిన ఎన్నికల ప్రచార సభలో ఆయన ఈ వ్యాఖ్యలు చేశారు. ఇరాన్‌పై అమెరికా చేపట్టిన సైనిక చర్యకు సంబంధించిన కీలక సమాచారం మీడియాకు లీక్‌ కావడంతో ఆపరేషన్‌ సమయాన్ని మార్చాల్సి వచ్చిందని ఆరోపించారు.
ఇరాన్‌ అణు కేంద్రాలపై దాడికి ముందు అమెరికా బీ-2 స్టెల్త్‌ బాంబర్లు బయలుదేరే సమయం, చేరుకునే వివరాలు మీడియాకు చేరాయని ట్రంప్‌ పేర్కొన్నారు. ఈ సమాచారం న్యూయార్క్‌ టైమ్స్‌, సీఎన్‌ఎన్‌ వార్తల్లో ప్రచురితమైనట్లు ఆరోపించారు. మిస్సోరీ నుంచి బాంబర్లు బయలుదేరే సమయం బయటకు పొక్కడంతో సైనిక చర్య ప్రమాదంలో పడిందని, ఉన్నతాధికారులతో చర్చించిన అనంతరం దాడిని వాయిదా వేయాలని నిర్ణయించుకున్నట్లు వెల్లడించారు. తొలుత నిర్ణయించిన సమయానికి బదులుగా రెండు రోజుల తర్వాత దాడి నిర్వహించామని తెలిపారు.
అయితే, ఈ సమాచారాన్ని ఎవరు లీక్‌ చేశారనే విషయాన్ని ట్రంప్‌ వెల్లడించలేదు. తన ఆరోపణలకు మద్దతుగా ఆధారాలను కూడా చూపలేదు. అమెరికాలో జాతీయ రక్షణకు సంబంధించిన రహస్య సమాచారాన్ని అనధికారికంగా బయటపెట్టడంపై ఎస్పియోనేజ్‌ యాక్ట్‌ వంటి చట్టాల కింద చర్యలు తీసుకునే అవకాశం ఉంది. ఈ నేపథ్యంలో సైనిక రహస్యాల లీకేజీపై ట్రంప్‌ చేసిన వ్యాఖ్యలు ప్రాధాన్యం సంతరించుకున్నాయి.